Գիտաժողովի մանրամասներ
Հայաստանի պետական տնտեսագիտական համալսարանը (ՀՊՏՀ), «ԱՐՄՍՎԻՍԲԱՆԿ» ՓԲԸ-ն, AMX-ը (Հայաստանի ֆոնդային բորսա և Կենտրոնական դեպոզիտարիա), «ԷՓՐԻՔՈԹ ԿԱՊԻՏԱԼ» ՓԲԸ-ն և Եվրո-Ասիական ֆոնդային բորսաների միությունը (FEAS) հայտարարում են Աշոտ Սալնազարյանի անվան ուսանողական գիտաժողով։
Գիտաժողովը տեղի կունենա 2023թ․-ի ապրիլի 13-14-ը։ Գիտաժողովի խորագիրն է․
«ՀՀ ԿԱՊԻՏԱԼԻ ՇՈՒԿԱՅԻ ԿԱՅԱՑՄԱՆ ՈՒՂԻՆԵՐՆ ՈՒ ՀԵՌԱՆԿԱՐՆԵՐԸ»
Գիտաժողովին ներկայացված լավագույն աշխատանքներն ու ներկայացումները պարգևատրվելու են: Առաջին երեք տեղերի համար նախատեսված են դրամական պարգևներ․
- 1-ին տեղ՝ 400,000 ՀՀ դրամ
- 2-րդ տեղ` 250,000 ՀՀ դրամ
- 3-րդ տեղ` 150,000 ՀՀ դրամ
Նախատեսված են նաև հատուկ խրախուսական նվերներ։
Գիտաժողովին ակտիվ մասնակցություն ցուցաբերած լավագույն ուսանողները հնարավորություն են ստանալու փորձառություն անցնելու ոլորտի առաջատար ֆինանսական ընկերություններում։
Մասնակցության կարգը
Գիտաժողովին կարող են մասնակցել ՀՀ և ԱՀ բուհերի՝ տնտեսագիտական մասնագիտություններով ուսումնառող բակալավրիատի և մագիստրատուրայի ուսանողները։ Գիտաժողովին ներկայացված բոլոր զեկույցները անցնելու են հետազոտական աշխատանքին ներկայացված պահանջներին համապատասխանության ստուգում և անանուն գրախոսություն։ Գիտաժողովին մասնակցության (զեկուցման) թույլատրվելու են այն աշխատանքները, որոնք գրախոսների կողմից կարժանանան դրական գնահատականի: Գիտաժողովին ներկայացված զեկույցներից լավագույնները ընտրվելու են գիտաժողովի կազմակերպիչներից կազմված ժյուրիի կողմից։
Զեկույցների թեմաները
Մասնակիցները կարող են ներկայացնել զեկույցներ գիտաժողովի խորագրի շրջանակում իրականացված ցանկացած թեմայով։ Այդուհանդերձ, գիտաժողովի կազմակերպիչները խրախուսում են մասնակիցներին վերլուծություններ կատարել ներքոնշյալ հետևյալ հարցադրումների շրջանակում՝ առավել արդի խնդիրների և հնարավորությունների շուրջ պրակտիկ հետազոտություններ իրականացնելու նպատակով․
Ինչու՞ ՀՀ կապիտալի շուկան չի ծառայում կազմակերպությունների ներդրումային ծրագրերի ֆինանսավորման արդյունավետ այլընտրանք,
Որո՞նք են ՀՀ կապիտալի շուկայի միջոցով պետական և համայնքային ներդրումային խոշոր ծրագրերի ֆինանսավորման հնարավորությունները և դրանց իրագործման խնդիրները,
Ինչպիսի՞ նոր գործիքակազմի կամ այլընտրանքային ֆինանսավորման կառուցակարգերի (օրինակ՝ քրաուդֆանդինգ) ներդրումը կարող է նպաստել ՀՀ կապիտալի շուկայի զարգացմանը,
Ի՞նչ բարեփոխումներ պետք է իրականացնի ՀՀ կապիտալի շուկան կարգավորող մարմինը շուկան զարգացնելու նպատակով,
Ինչպե՞ս ապահովել հասարակության լայն շրջանակների ակտիվ մասնակցությունը կապիտալի շուկայի միջոցով իրականացվող ներդրումային ծրագրերին,
Ի՞նչ նոր հնարավորություններ կարող է ստեղծել բորսայում շրջանառվող ֆոնդերի (ETF) ձևավորումը ՀՀ կապիտալի շուկայում և որոնք են դրանց ներդրման խնդիրները,
Ի՞նչ գործիքակազմի և կառուցակարգերի կիրառման միջոցով կարող են ֆինանսական ինստիտուտները (ներդրումային, կենսաթոշակային, ապահովագրական ֆոնդեր, բանկեր) առանցքային դերակատարում ունենալ կապիտալի շուկայի զարգացման և տնտեսության ֆինանսավորման գործում,
Ինչպե՞ս կարող են մասնավոր բաժնեմասնակցային ֆոնդերը նպաստել ՀՀ կապիտալի շուկայի զարգացմանը,
Ինչ կառուցակարգերի միջոցով կարելի է բարձրացնել ՀՀ կապիտալի շուկայի իրացվելիությունը,
Ի՞նչ դերակատարում կարող են ունենալ ստարտափ ընկերությունները և վենչուրային ֆոնդերը կապիտալի շուկայի զարգացման գործում,
Որո՞նք են ՀՀ կապիտալի շուկան միջազգային շուկաներին ինտեգրման հիմնական ուղղությունները,
Որո՞նք կարող են լինել կապիտալի շուկայի ռազմավարական զարգացման հիմնական ուղղությունները համաշխարհային արդի զարգացումների համատեքստում,
Որո՞նք են ՀՀ կապիտալի շուկայում ինդեքսների հաշվարկման և կիրառման հնարավորություններն ու խնդիրները,
Ինչպիսի՞ն է կենսաթոշակային ֆոնդերի գործունեության արդյունավետությունը ՀՀ կապիտալի շուկայի և միջազգային շուկաների համատեքստում, և ո՞րն է վերջինիս դերակատարումը տնտեսության ֆինանսավորման գործում,
Որո՞նք են կրիպտոարժույթների ներդրման հնարավորություներնն ու խնդիրները ՀՀ-ում։